"आस्थाच्या 'सुपर मॉम' पुरस्काराच्या यंदाच्या मानकरी ठरल्या सौ. ज्योत्स्ना अजित कुळये"

आस्था सोशल फाउंडेशन रत्नागिरी या दिव्यांगांसाठी समर्पित संस्थेकडून दरवर्षी 8 मार्च जागतिक महिला दिनी 'सुपर मॉम' हा पुरस्कार देण्यात येतो. शाल,श्रीफळ, सन्मानचिन्ह व रक्कम रुपये पाच हजार चा धनादेश असे या पुरस्काराचे स्वरूप असते. आणि यंदाच्या या पुरस्काराच्या मानकरी ठरल्या आहेत सौ. ज्योत्स्ना अजित कुळये, त्या उमराड गुहागरच्या माहेरवाशीण व गोविळ,लांजा येथील सासरवाशिण पण उदरनिर्वासाठी लग्नानंतर मुंबईला असतांना 2007 साली त्यांच्या मोठ्या मुलाचा देवेश चा जन्म झाला. परंतु डॉक्टरांनी सांगितले की देवेश ला मणक्याचा आजार आहे, एक दोन नाही देवेशच्या 14 छोट्या मोठ्या शस्त्रक्रिया झाल्या, परंतु देवेश स्वतःच्या पायावर उभा राहू शकला नाही. पण ज्योत्स्ना ताई सासरच्या मंडळीच्या आधाराने खंबीर उभ्या राहिल्या. सुरुवातीला त्याला विशेष शाळेत प्रवेश दिला, परंतु त्याची बुद्धिमत्ता चांगली असल्याने त्याला सामान्य शाळेत ज्योत्स्ना ताईने दाखल केले. रोज त्याला उचलून घेऊन जाऊन शाळेत व्हील चेअर वर बसवायचं आणि तिथेच थांबून परत शाळा सुटली की परत घरी आणायचं. दिवसभर शाळेत बसून असल्यामुळे तेथील मुख्याध्यापिकांनी ज्योत्स्ना ताईंना बाल वर्गाला शिकवण्याची संधी दिली. दहावी शिक्षण झालेल्या ताईंनी त्याचेही सोने केले. लॉकडाऊन लागले म्हणुन त्या देवेश ला घेऊन रत्नागिरी जिल्ह्यातील लांजा तालुक्यातील बेणी गावात धनावडे नर्सरी मध्ये त्यांचे पती अजित महादेव कुळये काम करत होते तेथे राहण्यासाठी आल्या. आणि मग पुढे लॉकडाऊन नंतर देखील त्यांनी इकडेच राहण्याचा निर्णय घेतला व देवेशला न्यू इंग्लिश स्कूल लांजा येथे प्रवेश दिला. इकडे त्याला रोज रिक्षा शाळेत ने आण करत चालु असलेल्या संघर्षाचे चीज झाले. देवेश 74% गुण मिळवून दहावी पास झाला. देवेश ला ऐकण्याचा देखील त्रास असल्यामुळे त्यांनी अकरावी कॉमर्स ला तु.पुं.शेटये कनिष्ठ महाविद्यालयात प्रवेश घेतला. या मायलेकाच्या जिद्दीची दखल घेत, अकरावी बारावीला त्याला उडान दिव्यांग शिष्यवृत्ती मिळाली आहे.यावर्षी देवेशने बारावीची परीक्षा दिली आहे. अत्यंत संघर्षमय परिस्थितीत आपल्या 85% बहुदिव्यांग मुलाला जिद्द, चिकाटीने यशस्वी व स्वावलंबी नागरिक म्हणून घडवण्यासाठी घेतलेल्या अपार कष्टा ला,मातृवाला वंदन करत आस्था ने त्यांना त्यांच्या निवासस्थानी जाऊन "सुपर मॉम "पुरस्कार दिला. विशेष म्हणजे त्यांच्या सासूबाई श्रीम. मंदाकिनी महादेव कुळये यांचा देखील त्यांना खंबीर पाठिंबा आहे.या प्रसंगी आस्थाच्या सचिव श्रीम. सुरेखा पाथरे,श्री. संकेत चाळके, हसना नेवरेकर, आल्हाद पाथरे उपस्थित होते.

श्रवणदोष प्रतिबंध व वेळीच निदान यासाठी जिल्हा प्रशासन कटिबद्ध

जिल्हा दिव्यांग सक्षमीकरण विभाग जिल्हा परिषद रत्नागिरी आणि जिल्हा दिव्यांग पुनर्वसन केंद्र रत्नागिरी यांच्या संयुक्त विद्यमाने जागतिक श्रवण दिन स्व. शामरावजी पेजे सांस्कृतिक भवन जिल्हा परिषद रत्नागिरी येथे साजरा करण्यात आला. जागतिक श्रवण दिनाच्या निमित्ताने संदेश देताना जिल्हा परिषदेच्या मुख्य कार्यकारी अधिकारी मा. वैदेही रानडे यांनी सांगितले की जिल्ह्यातील बालकांमध्ये श्रवणदोष निर्माण होऊ नये यासाठी सर्वांनी खबरदारी घेतली पाहिजे. जन्मजात बालकांमध्ये श्रवणदोष अनुवंशिक रित्या निर्माण होऊ नये याकरिता मूकबधिर दाम्पत्यांनी मूल जन्माला घालण्यापूर्वी जेनेटिक कौन्सिलिंग करणे आवश्यक आहे. तसेच जन्मजात श्रवण दोषाचे वेळीच निदान होण्याकरिता जिल्ह्यातील सर्व ग्रामीण रुग्णालय व उपजिल्हा रुग्णालया मध्ये नवजात बालकांची श्रवणदोष चाचणी सुविधा उपलब्ध आहे. शासकीय किंवा खाजगी रुग्णालयात जन्माला येणाऱ्या प्रत्येक शिशु ची चाचणी होणे आवश्यक आहे. याकरिता अंगणवाडी सेविका, आशा सेविका तसेच माता-पितांनी देखील सजग राहण्याचे आवाहन याप्रसंगी त्यांनी केले. या कार्यक्रमाचे उद्घाटन श्रीमती सुनिता शिरभाते, जिल्हा दिव्यांग सक्षमीकरण अधिकारी, जिल्हा परिषद रत्नागिरी यांच्या हस्ते दीप प्रज्वलन करून करण्यात आले. आलेल्या मान्यवरांचे स्वागत जिल्हा दिव्यांग पुनर्वसन केंद्र रत्नागिरीच्या प्रकल्प संचालक श्रीमती सुरेखा पाथरे यांनी केले. समाजातून शाळेकडे प्रत्येक मुलासाठी श्रवण आरोग्य या जागतिक श्रवण दिन थीम बाबत प्रस्तावनेत श्रीमती सुनिता शिरभाते यांनी माहिती दिली. राष्ट्रीय बाल स्वास्थ कार्यक्रमाच्या व्यवस्थापक श्रीम. आरती कदम यांनी श्रवणदोष असलेल्या बालकांसाठी उपलब्ध असलेल्या संदर्भ सेवा योजनांचे या प्रसंगी मार्गदर्शन केले. तसेच जिल्ह्यातील सर्व उपजिल्हा रुग्णालय व ग्रामीण रुग्णालय येथे जन्मजात बालकांच्या श्रवणदोष तपासणी ची सेवा उपलब्ध असल्याचे सांगितले. श्रवणदोषाच्या प्रतिबंधाबद्दल डॉ. कश्मीरा चव्हाण यांनी उपस्थितांना मार्गदर्शन केले. तर लवकर निदान व लवकर उपचार याबाबत वाचा उपचार तज्ञ श्रीम. प्राजक्ता भोगटे-सातवसे यांनी सविस्तर विवेचन केले. या कार्यक्रम प्रसंगी शासकीय वैद्यकीय महाविद्यालय रत्नागिरी, तथा सामान्य रुग्णालय रत्नागिरी येथील कान नाक घसा तज्ञ डॉ. वैभवी व्यास, व वाचा उपचार तज्ञ श्री. अभिषेक गांधी, विशेष शिक्षिका श्रीम. मयेकर, कै. के. पी. अभ्यंकर मूकबधीर विद्यालयचे प्रभारी मुख्याध्यापक श्री. गजानन राजपूत देखील विचार पिठावर उपस्थित होते. श्रवण बाधित दिव्यांगांच्या समस्या, विविध योजना व पुनर्वसन याबाबत जिल्हा दिव्यांग पुनर्वसन केंद्राच्या प्रकल्प संचालक श्रीमती सुरेखा पाथरे यांनी उपस्थितांशी चर्चा केली. या प्रसंगी कॉकलेअर इम्प्लांट शस्त्रक्रियेनंतर मुख्य प्रवाहात आलेल्या आर्या सुशांत रेवाळे या विद्यार्थ्यांनीने सावित्रीबाई फुले यांच्या जीवनावर भाषण केले. कै. के. पी. अभ्यंकर मूकबधिर शाळेच्या माजी मुख्याध्यापिका सौ. अनुराधा ताटके यांचा याप्रसंगी सन्मान करण्यात आला. श्रवणदोष असलेल्या बालकांची व प्रौढ व्यक्तींची आस्था फिरते श्रवणदोष चाचणी केंद्रात तपासणी करण्यात आली. या कार्यक्रमाचे साईंन लँग्वेज इंटरप्रीटर म्हणून सौ सीमा मुळे यांनी काम पाहिले, सूत्रसंचालन श्री. राजेश गोसावी यांनी केले. तर आभार प्रदर्शन जिल्हा दिव्यांग सक्षमीकरण कक्षातील वैद्यकीय सामाजिक कार्यकर्ता श्री. संजय बलाढ्ये यांनी केले.

आस्था च्या दिव्यांग प्रेरणा पुरस्काराचा यंदा चा मानकरी ठरला धिरज साठविलकर

आस्था सोशल फाउंडेशन रत्नागिरी या दिव्यांगांसाठी समर्पित संस्थे मार्फत जागतिक दिव्यांग दिनी देण्यात येणाऱ्या दिव्यांग प्रेरणा पुरस्काराचे वितरण मा. वैदही रानडे मुख्य कार्यकारी अधिकारी जिल्हा परिषद रत्नागिरी यांच्या हस्ते आज जिल्हा परिषद आयोजित कार्यक्रमात हरहुन्नरी कलाकार श्री. धिरज राजेंद्र साठविलकर यांना प्रदान करण्यात आला. पाच हजार रुपये चा धनादेश, शाल, श्रीफळ, व सन्मान चिन्ह असे या पुरस्काराचे स्वरूप होते. या प्रसंगी विचारपिठावर जिल्हा दिव्यांग सक्षमीकरण अधिकारी मा. सुनिता शिरभाते, रत्नागिरी बांधकाम विभागाच्या कार्यकारी अभियंता मा. बिराजे मॅडम, शिक्षणाधिकारी श्री. किरण लोहार,ऍडव्होकेट श्री. धुरत व आस्था सोशल फाउंडेशन रत्नागिरीच्या सचिव सुरेखा पाथरे उपस्थित होत्या. विशेष म्हणजे धिरज ने आपल्या पायाने वैदेही रानडे मॅडम चे चित्र काढून त्यांना ते या प्रसंगी भेट दिले.